HE KUPU WHAKATAKI

Ka rere arorangi ngā whakamoemiti ki te Runga Rawa, nāna te kākano o tēnei whare i whakatō i tōna whenua haumako kia tupu, kia puāwai.
 
Ko ngā pakiaka o te whare ko ngā iwi maha o Tainui waka, ko rātou te ahi kā roa e pupuru tonu nei i te mauri o te whenua.
 
Ko te pūmanawa o te whare, ko ngā whānau katoa e kuhu mai nei, e whakahikohiko nei i a ia.
 
Ko ngā wai o roto, ko ngā tini awa o ngā mātāwaka e rere mai nei, e kōkiri nei i tōna kaupapa.
 
Ko te kaupapa he mahi tahi, he kāpui, he tuitui i ngā whakaaro o ngā tūpuna, o tauiwi hoki, hei hāpai i ngā iwi, i ngā hapū maha, kia whai oranga, kia TŪ TONU i tēnei ao hurihuri.